Улсын тэмдэгтийн хураамжийг шүүхийн байранд байрлах "Гэрэгэ" киоск төхөөрөмжөөр төлнө.

• Цахимаар /цахим шүүх систем тун удахгүй/
• Өөрийн биеээр шүүхэд өгөх

Манай хаяг:

Иргэний хэрэг хянан шийдвэр тухай хуулиас:

65.1.Шүүгч дараахь тохиолдолд захирамж гарган нэхэмжлэлийг хүлээн авахаас татгалзана:
65.1.1.энэ хуулийн 13 дугаар зүйлд заасан хэргийн харьяалал зөрчсөн;
65.1.2.энэ хуулийн 14, 15, 16, 19 дүгээр зүйлд заасан шүүхийн харьяалал зөрчсөн;
65.1.3.шүүхээс гадуур урьдчилан шийдвэрлүүлэх талаар хуульд заасан журмыг нэхэмжлэгч зөрчсөн ба энэ журмыг хэрэглэх боломжтой байвал;
65.1.4.нэхэмжлэгч нь эрх зүйн бүрэн чадамжгүй этгээд байвал;
65.1.5.нэхэмжлэгчийг төлөөлөх бүрэн эрхгүй этгээд нэхэмжлэл гаргасан;
65.1.6.нэхэмжлэлд дурдсан үйл баримт, зохигчийн гэм буруугийн талаар хуулийн хүчин төгөлдөр шүүхийн болон арбитрын шийдвэр, эсхүл нэхэмжлэлийг хүлээн авахаас татгалзсан, түүнчлэн хэргийг хэрэгсэхгүй болгосон хуулийн хүчин төгөлдөр шүүхийн болон арбитрын шийдвэр буюу шүүхийн тогтоол, шүүгчийн захирамж байгаа;
65.1.7.зохигчийн маргаж байгаа зүйл ба түүний үндэслэлийн талаархи өөр хэргийг шүүх шийдвэрлэж байгаа;
65.1.8.уг нэхэмжлэлтэй холбоотой хэргийг эрүүгийн журмаар шалгаж байгаа;
65.1.9.хариуцагчийн хаяг тодорхойгүй;
65.1.10.зохигч болох хүн нас барсан, хуулийн этгээд татан буугдсан тохиолдолд маргаж байгаа шаардлага буюу маргаантай үүрэг нь эрх залгамжлагчид шилжээгүй;
65.1.11.энэ хуулийн 62 дугаар зүйлд заасан шаардлагыг хангаагүй байвал.
65.2.Шүүгч энэ хуулийн 65.1-д заасан захирамждаа уг нэхэмжлэлийг хэрхэн мэдүүлэх, эсхүл шүүх түүнийг хүлээн авахад саад болж байгаа зөрчлийг хэрхэн засахыг зааж өгнө.

1. Зохигчдын эвлэрлийг баталж, хэргийг хэрэгсэхгүй болгох тухай
   

   Дүүргийн Эрүү, Иргэний хэргийн хялбар ажиллагааны анхан шатны тойргийн шүүхийн Шийдвэр

   2025 оны 05 сарын 15 өдөр   Дугаар 197/ШШ2025/06121

   Зохигчдын эвлэрлийг баталж,
   хэргийг хэрэгсэхгүй болгох тухай

   Дүүргийн Эрүү, Иргэний хэргийн хялбар ажиллагааны анхан шатны тойргийн шүүхийн шүүгч Ч.Мөнхцэцэг би,

   Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.2, 123 дугаар зүйлийн 123.1 дэх хэсгийг удирдлага болгон, ЗАХИРАМЖЛАХ нь:

   1. *** СӨХ-ны нэхэмжлэлтэй, Ц.Н-д холбогдох, дундын өмчлөлийн зүйлийн ашиглалт, засвар үйлчилгээний зардалд 1,902,008 төгрөг гаргуулахыг хүссэн иргэний хэрэгт хариуцагч Ц.Н нь нэхэмжлэлийн шаардлага 1,521,607 төгрөгийг хариуцагч хүлээн зөвшөөрч, 2025.06.25-ны өдрийн дотор 507,202 төгрөг, 2025.07.25-ны өдрийн дотор 507,202 төгрөг, 2025.08.25-ны өдрийн дотор 507,203 төгрөгийг *** СӨХ-ны Төрийн банкны *** тоот дансанд шилжүүлэхээр харилцан тохиролцож эвлэрсэн зохигчдын эвлэрлийг баталж, хэргийг хэрэгсэхгүй болгосугай.

   2. Иргэний хэрэг шүүхэд хянан шийдвэрлэх тухай хуулийн 74 дүгээр зүйлийн 74.5 дахь хэсэгт зааснаар нэхэмжлэгчээс улсын тэмдэгтийн хураамжид төлсөн 45,383 төгрөгийн 50 хувь болох 22,691.50 төгрөгийг улсын төсвөөс 50 хувь болох 22,691.50 төгрөгийг хариуцагчаас гаргуулж нэхэмжлэгчид олгосугай. 

   3. Иргэний хэрэг шүүхэд хянан шийдвэрлэх тухай хуулийн 75 дугаар зүйлийн 75.6 дахь хэсэгт зааснаар энэхүү захирамжийг хариуцагч сайн дураар биелүүлээгүй бол шүүхийн шийдвэрийн нэгэн адил албадан гүйцэтгэх журамтайг мэдэгдсүгэй. 

   4. Хэргийг хялбаршуулсан журмаар хянан шийдвэрлэсэн тул зохигч давж заалдах, хяналтын журмаар гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай. 

    

   ШҮҮГЧ Ч.МӨНХЦЭЦЭГ

2. Нэхэмжлэлийн зарим хэсгийг хангаж шийдвэрлэв
   

   Дүүргийн Эрүү, Иргэний хэргийн хялбар ажиллагааны анхан шатны тойргийн шүүхийн Шийдвэр

   2025 оны 05 сарын 30 өдөр    Дугаар 197/ШШ2025/07209

   МОНГОЛ УЛСЫН НЭРИЙН ӨМНӨӨС

   Дүүргийн Эрүү, Иргэний хэргийн хялбар ажиллагааны анхан шатны тойргийн шүүхийн шүүгч Ц.Урангуа даргалж, тус шүүхийн танхимд хийсэн хуралдаанаар:

   Нэхэмжлэгч: ******************/-н нэхэмжлэлтэй,

   Хариуцагч: ******************д холбогдох

   Нэхэмжлэлийн шаардлага: дундын өмчлөлийн ашиглалт, засвар үйлчилгээтэй холбогдсон зардал 2,494,864 төгрөг гаргуулах тухай иргэний хэргийг тусгайлсан журмаар хянан хэлэлцэв.

   Шүүх хуралдаанд: Нэхэмжлэгчийн итгэмжлэлгүйгээр төлөөлөгч *********, шүүх хуралдааны нарийн бичгийн дарга М.Ундрам нар оролцов.

   ҮНДЭСЛЭХ нь:

   1. Нэхэмжлэгч “******************нэхэмжлэлийн шаардлагын зарим хэсгийг нь хангах үндэслэлтэй гэж үзлээ.

   2. Хариуцагч шүүх хуралдаанд хүндэтгэн үзэх шалтгаангүйгээр хүрэлцэн ирээгүй бөгөөд нэхэмжлэгч түүнийг эзгүйд хэргийг хэлэлцэх хүсэлттэй байгаагаа илэрхийлсэн тул Иргэний хэрэг шүүхэд хянан шийдвэрлэх тухай хуулийн 100 дугаар зүйлийн 100.3-т “Хариуцагч, түүний төлөөлөгч буюу өмгөөлөгч хүндэтгэн үзэх шалтгаангүйгээр шүүх хуралдаанд ирээгүй бол нэхэмжлэгч хэргийг түүний эзгүйд хянан шийдвэрлэх талаар хүсэлт гаргаж болно. Энэ тохиолдолд шүүх нэхэмжлэгчээс гаргасан тайлбар болон бусад баримт нотолгоог үндэслэн хэргийг хянан шийдвэрлэнэ.” гэж зааснаар хэргийг хянан хэлэлцсэн болно.

   3. “******************нь ******************дундын өмчлөлийн ашиглалт, засвар үйлчилгээтэй холбогдсон зардал 2,494,864 төгрөгийг гаргуулахаар шаардах эрхээ тодорхойлж, харин хариуцагч ******************нэхэмжилж байгаа мөнгийг бүтнээр нь төлөхгүй, оршин суугчдийн хурлаар байгуулагдсан шинэ СӨХ-н ажиллаж эхэлсэн өдрөөс эхлэн гарсан төлбөрөө сар сард хуваан төлнө гэсэн тайлбарыг ирүүлсэн байна.

   4. Хэрэгт авагдсан баримтаас үзэхэд: ****************** 2022 оны 2 дугаар сарын 9-ний өдрөөс бүртгэж, гэрчилгээ олгосон байх бөгөөд хариуцагчийн орон сууц хамрагдсан байгаа нь бичгийн баримтаар тогтоогдож байна.

   Дундын өмчлөлийн зүйлийн ашиглалт, засвар үйлчилгээтэй холбогдсон зардлын тогтмол төлбөрт 29,950 төгрөг, үүний цэвэрлэгээ 16,000, лифт 5,000, гэрэлтүүлэг засвар үйлчилгээ 9,000, ариутгал 1,000, жижүүр 3,800, баримт 150 төгрөг байхаар тус тус тооцож, санхүүжүүлдэг байна./5, 10-11-р хуудас/

   5. Иргэний хуулийн 143 дугаар зүйлийн 143.4-т зааснаар Орон сууцанд оршин суугаа сууц өмчлөгч бусад этгээд заавал тухайн холбооны гишүүн байна гэсний дагуу хариуцагч нь тухайн сууц өмчлөгчдийн холбооны гишүүн байна.

   Мөн хуулийн 147 дугаар зүйлийн 147.1-д зааснаар гишүүн нь дундын өмчлөлийн зүйлийн ашиглалт, засвар үйлчилгээтэй холбогдсон зардлыг сууц өмчлөгчдийн холбоонд төлөх үүрэгтэй ба мөн хуулийн 148 дугаар зүйлийн 148.2.3-т зааснаар орон сууц өмчлөгч нь дундын өмчлөлийн зүйлийн засвар, үйлчилгээний зардлыг санхүүжүүлэхэд оролцох үүрэгтэй гэж хуульчилжээ.

   6. Хариуцагч ******************2014 оны 1 сараас 2025 оны 4 дүгээр сар хүртэл хугацаанд дундын өмчлөлийн зүйлийн ашиглалт, засвар үйлчилгээтэй холбогдсон зардалд 2,494,864 төгрөг төлөөгүй гэж нэхэмжлэгч тайлбарлаж, төлбөрийн нэхэмжлэхийг нотлох баримтаар гаргаж өгсөн.

   7. Гэвч шүүхээс дээрх нэхэмжлэлийн хугацааг дүгнэхэд Иргэний хуулийн 75 дугаар зүйлийн 75.2.3 дахь хэсэгт “тогтсон хугацааны туршид гүйцэтгэх үүрэгтэй холбогдон шаардлага гаргах хөөн хэлэлцэх хугацаа гурван жил” гэж заасантай нийцүүлэн 2022 оны 4 сараас өмнөх төлбөрийг нэхэмжлэгч шаардах эрхээ алдсан байна гэж үзлээ.

   Тодруулбал 3 жилээс өмнөх төлбөрийн шаардлага гаргах хөөн хэлэлцэх хугацаа өнгөрсөн тул шүүхээс 2022 оны 4 сараас 2025 оны 4 сар хүртэлх дундын өмчлөлийн зүйлийн ашиглалт, засвар үйлчилгээтэй холбогдсон зардалд 1,167,450 төгрөгийг “******************” СӨХ-нд хариуцагч ******************төлөх үүрэгтэй гэж дүгнэв.

   8. Иймд нэхэмжлэгч “******************” СӨХ-н нэхэмжлэлийн шаардлагаас 1,324,414 төгрөгийг хэрэгсэхгүй болгож, үлдсэн 1,167,450 төгрөгийг хариуцагч ******************гаргуулж, нэхэмжлэгч “******************” СӨХ-д олгох нь зүйтэй.

   9. Нэхэмжлэгч эрх зүйн маргааныг хянан шийдвэрлүүлэхээр улсын тэмдэгтийн хураамжид урьдчилан 54,870 төгрөг төлснийг улсын орлогод хэвээр үлдээж, нэхэмжлэлийн хангасан дүнд тооцогдох 32.568.8 төгрөгийг хариуцагчаас гаргуулж, нэхэмжлэгчид олгох нь хуульд нийцнэ.

   Иргэний хэрэг шүүхэд хянан шийдвэрлэх тухай хуулийн 100 дугаар зүйлийн 100.3, 759 дүгээр зүйлийн 759.1, 115 дугаар зүйлийн 115.2.2-т заасныг удирдлага болгон

   ТОГТООХ нь:

               1. Иргэний хуулийн 75 дугаар зүйлийн 75.2.3, 147 дугаар зүйлийн 147.1, 148 дугаар зүйлийн 148.2.3-т зааснаар нэхэмжлэгч “******************” СӨХ-н нэхэмжлэлийн шаардлагаас 1,324,414 төгрөгийг хэрэгсэхгүй болгож, үлдсэн 1,167,450 төгрөгийг хариуцагч ******************гаргуулж, нэхэмжлэгч “******************” СӨХ-д олгосугай.

   2. Иргэний хэрэг шүүхэд хянан шийдвэрлэх тухай хуулийн 56 дугаар зүйлийн 56.2, Улсын тэмдэгтийн хураамжийн тухай хуулийн 7 дугаар зүйлийн 7.1.1-д зааснаар нэхэмжлэгч “******************” СӨХ-с улсын тэмдэгтийн хураамжид төлсөн 54,870 төгрөгийг улсын орлогод хэвээр үлдээж, хариуцагч ******************32.568.8 төгрөгийг гаргуулж, “******************” СӨХолбоонд олгосугай.

   3. Иргэний хэрэг шүүхэд хянан шийдвэрлэх тухай хуулийн 7511 дүгээр зүйлийн 7511.1.-т зааснаар шүүхийн шийдвэрийг эс зөвшөөрвөл гардан авснаас хойш 7 хоногийн дотор Нийслэлийн Иргэний хэргийн давж заалдах шатны шүүхэд гомдол гаргах эрхтэй болохыг дурдсугай.

    

   ДАРГАЛАГЧ ШҮҮГЧ                                    Ц.УРАНГУА

3. Нэхэмжлэгч нэхэмжлэлийн шаардлагаасаа татгалзсаныг баталж, хэргийг хэрэгсэхгүй болгох тухай
   

   Дүүргийн Эрүү, Иргэний хэргийн хялбар ажиллагааны анхан шатны тойргийн шүүхийн Шийдвэр

   2025 оны 05 сарын 13 өдөр   Дугаар 197/ШШ2025/05973 

   Нэхэмжлэгч нэхэмжлэлийн шаардлагаасаа татгалзсаныг

   баталж, хэргийг хэрэгсэхгүй болгох тухай 

   Дүүргийн Эрүү, Иргэний хэргийн хялбар ажиллагааны анхан шатны тойргийн шүүхийн шүүгч Ч.Мөнхцэцэг даргалж, тус шүүхийн танхимд хийсэн иргэний шүүх хуралдаанаар: 

   Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.5, 123 дугаар зүйлийн 123.1 дэх хэсгийг удирдлага болгон, ЗАХИРАМЖЛАХ нь: 

   1. Э.Л-д холбогдох, дундын өмчлөлийн эд хөрөнгийн ашиглалт, засвар үйлчилгээний зардалд 539,000 төгрөг гаргуулахыг хүссэн нэхэмжлэлийн шаардлагаасаа нэхэмжлэгч **** СӨХ татгалзсаныг баталж, хэргийг хэрэгсэхгүй болгосугай. 

   2. Улсын тэмдэгтийн хураамжийн тухай хуулийн 7 дугаар зүйлийн, 7.1.1, Иргэний хэрэг шүүхэд хянан шийдвэрлэх тухай хуулийн 106 дугаар зүйлийн 106.6 дахь заалтыг баримтлан нэхэмжлэгчээс улсын тэмдэгтийн хураамжид төлсөн 16,820 төгрөгийг улсын орлогод хэвээр үлдээсүгэй. 

   3. Хэргийг хялбаршуулсан журмаар хянан шийдвэрлэсэн тул зохигч давж заалдах, хяналтын журмаар гомдол гаргах, тухайн асуудлаар анхан шатны шүүхэд дахин нэхэмжлэл гаргах эрхгүй болохыг дурдсугай. 

      

   ДАРГАЛАГЧ ШҮҮГЧ   Ч.МӨНХЦЭЦЭГ